羅馬尼亞練兵翻嗒立陶宛

猪拉多纳

踏入國際賽期，今晚率先上演幾場熱身賽，當中直播戲碼之一羅馬尼亞主場鬥立陶宛較有睇頭。羅馬尼亞今夏要出戰歐國盃決賽周，梗係積極備戰喇，而且近年交手食住立陶宛，斯維撐讓球主勝。

（TVB 302周四凌晨2時直播）

羅馬尼亞今夏歐國盃身處A組，將與東道主法國合演揭幕戰，時間無多，梗係要把握機會練兵喇。羅馬尼亞於歐國盃外圍賽10戰保持不敗，而且近11仗「拍跳」只輸1仗，曾經打和阿根廷、意大利等勁旅，絕對唔嘢小。立陶宛現時世界排名第128位，比第16位嘅羅馬尼亞低超過100位，就算搵來2004年曾協助波圖贏得2004年歐聯冠軍嘅名將贊卡斯卡斯做主帥，可惜班波質素太曳，加上近8次交手，羅馬尼亞贏咗7次，格食格之下再贏唔難。
波蘭炒「塞」話咁易

至於夜啲開波嘅波蘭主場對塞爾維亞，波蘭亦要打歐國盃，與兩年前世盃冠軍德國、烏克蘭及北愛同於C組，呢支東歐球隊已全面升呢，曾喺外圍賽贏過德國，拜仁箭頭羅拔利雲度夫斯基為國效力一樣着晒火，近5次有披甲嘅賽事狂轟8粒。

相反，塞爾維亞自2010年世盃後，已連續3屆與大賽決賽周絕緣，縱有伊雲洛域、高拉洛夫、尼曼查馬迪等英超兵壓陣，都係踢到一盤散沙，就算計埋塞爾維亞及黑山年代，近6次對波蘭未贏過之餘，仲輸咗3場，面對有弗爆「羅拔仔」擔大旗嘅波蘭，難逃厄運。

（TVB 301周四凌晨3時45分直播）