三獅軍團開大冇「蘭」度

猪拉多纳

近8戰狂轟21粒

呢輪國際賽檔期的確好波連場，唔少名牌球隊將分途出戰，其中啱啱反勝德國3:2攞晒彩嘅英格蘭，回師主場迎擊荷蘭。賽前兩軍正選門將畢蘭特、施利臣均告受傷，對球隊防守力造成影響，再講「三獅軍團」中前場新人輩出，所有球員都必須為保住自己位置搏命，呢次對住攻強守弱嘅荷蘭，誓再上演一場入球騷，2.02倍入球大值得捧場。

（開賽時間：周三凌晨3:00）

英格蘭上仗憑住前鋒哈利卡尼、占美華迪同中場艾歷迪亞嘅入球，以3:2反勝德國，演出贏盡掌聲。其中後兩者更攻入個人首個國家隊士哥，大大提升自己喺主帥鶴臣心目中嘅形象，據講佢老人家今仗好大機會畀李斯特城中場真禾特攞到首頂喼帽添。家陣成支英軍朝氣勃勃，今次喺鄉親父老面前獻技，邊肯放軟手腳先？
前鋒爭位唔敢唔搏

隨住一個個新人彈出，依家點到一班舊部，包括前鋒史杜列治、禾確特等人唔擔心，驚自己到時喺場邊做觀眾睇歐國盃呀！今仗實行要全力開火搶番鶴臣歡心至得。事實上「三獅軍團」呢排演出穩定，近8仗取得7勝兼攻入21球，近2仗鬥德、法兩大勁旅更合共攻入5球，火力毋庸置疑。不過門將畢蘭特打柴，鶴臣亦可能會搵中堅史東斯擔正進行考察，防守始終有隱憂。
荷蘭近6仗失13球

講防守荷蘭仲唔掂，呢支缺席歐國盃決賽周嘅褪色勁旅，已經連續6仗未能保持清白身，合共失咗13粒，呢鋪佢哋仲要冇埋門將施利臣幫手，都咪話唔牙煙。好在翼鋒迪比返到國家隊有起色，上仗鬥法國交出2個助攻，呢次對英格蘭肯定使出渾身解數，務求令由季初彈到佢依家嘅球迷收聲。考慮到「橙衫軍團」近9次對英格蘭，只係得1次冇貨交，相信佢哋今仗都唔會空手而回。