借題發揮：相差8W 發力追柏寶 韋達今期開TURBO

纯情小彩迷

　　巫斯義跑埋今期要停賽，意味着佢嘅客串期提早於今期結束，暫時未知下季佢仲嚟唔嚟，定係一如傳聞做到練馬師，但點都好啦，佢的確係此間賽馬火紅年代的keyman之一，帶給我們不少回憶，當年幾件法國貨嚟到，迄今在此地得番佢仲跑緊馬，其實已經係bonus，因年紀唔細，負磅又唔輕，久不久陣上仍有代表作，都算佢本事！至於呢期佢坐騎當中，望落應該係第三、八場「紅旗輝揚」和「威騰駒」最有冠軍相，睇吓佢有冇運攞到埋齋馬嘞！？

　　另一方面，韋達與柏寶在騎師榜目前仍有8W的差距，之但係由最多的16W，縮窄到依家嘅數字，似乎又唔係完全冇得追噃。坦白說，近期阿寶「立」油就好明顯，成日都一場起，兩場止，但韋達情況就唔同，前一期先至中三元，14號嗰期贏夠4場，前者如手氣唔能夠及時扭轉，未到4月中或者已被過頭。

一「星」射雙「歡」

　　今期韋達坐騎滿晒額，牌面馬至少三幾隻，又係開turbo力追柏寶嘅大好機會；「進勝福星」、「齊歡唱」及「歡樂繽紛」賠率實熱，希望炒埋一碟。前駒初出好green，跑跑吓挨欄、側頭同閃出閃入，狀態都唔知有冇七成，不過臨尾片住都追得吓，唔係講笑，肯轉場和加程，心意向好。

　　「齊歡唱」及「歡樂繽紛」公認有質素，前駒轉馬房做好晒，加上同主「貝利高」轉飯鑊後冇起色，驅使呢匹馬更加會砌。後駒跑咁耐未甩過前兩名，準繩中見進步，而來到1400米第二回合，應會比上賽更具威力，穩守尾場是也！

亨利