馬主論戰

纯情小彩迷

霹靂槍加罩搏

　　我哋隻「霹靂槍」今日又上陣，呢隻馬前仗響田草1200米同「明燈」串Q，計落賽績其實唔曳，今日跑番同程，初戴眼罩上陣希望對走勢帶嚟正面幫助，加上負磅依然輕，希望可以順利贏番一場喇﹗

　　另一匹要留意嘅馬係「名人」，雖然上次只係同「鵬力洋洋」鬥到叮噹馬頭險勝，但其實已經彈甩後面一班對手，對一匹三歲馬嚟講係好理想表現。贏馬開竅之後，今次再跑勝途田草1600米，擺明有心打鐵趁熱，不妨玩番多少。

梁廷鏘

幸運相架有計

　　今日我哋隻「電訊財星」有份上陣，但增程跑1800米，表現如何跑過至知，希望有驚喜喇﹗講番心水，鍾意第五場「幸運相架」，在港跑過兩仗試前試後，睇嚟已經仄準晒能，今次縮番落嚟1400米上陣，隔晚飛數唔算好冷，隨時可以一網打盡。

　　另外一匹要留意嘅葉廐馬係「勁辣椒」，在港九戰都未贏過，無疑令人有多少失望，不過始終四歲仲後生，要贏番一仗應該唔難，今次初戴眼罩有晒搏殺手影，話唔定可出頭。

張敬山

鍾意福勝滿載

　　雖然方嘉柏鍾意響谷草搵食，但其實響田草都不時贏馬，今日我就睇好佢有頭馬進帳。最啱心水係第九場「福勝滿載」，在港四戰三捷，實力係點唔使多講，上場跑1000米直路賽彈甩對手嚟贏，今次再跑同程隨時可以照辦煮碗，值得吼實。

　　另外，尾場「聖河」亦都好有留意價值，雖然在港唯一頭馬響泥地取得，但上仗響1400米同「沙貝利」串Q，證明跑草地賽都好有威力，今次繼續搵韁繩一流嘅勞愛德替操刀，擺明有心謀補中。

任達華