借題發揮：唔經唔覺１個月冇W落袋 馬偉昌擊破齋砵

纯情小彩迷

　　唔經唔覺，馬偉昌原來守齋1個月有多，對上嗰場頭馬係28/2嘅「聖迪達」，即係話3月跑極都冇W。其實佢呢個月又唔係曾經停賽，又唔係冇馬跑，每期都喼住咁上下坐騎數量，話冇實力馬在手咩，又唔係噃！近期既熱又具餐士嘅唔少囉，如「勁辣椒」、「鷹闖」、「傑出君子」、「勁勇士」、「大家開心」等，好似後駒咁，「吱吱咗咗」輸埋，總之手風就係唔順。

　　睇睇今期阿昌坐騎，4隻之嘛，但似乎除第四場之外，餘下3隻唔係冇得贏；第二場「勁擊」，近兩仗唔覺跑得啱，正如前仗「無啦啦」走去田泥，又「無啦啦」走去放頭，唔輸先至奇，基本上可當冇跑過，視作試泥閘算罷啦！而上場未入直路前有位唔移出更是敗筆，但唔覺俊仔有好大問題，最多係猶豫不決，因佢之前曾騎此駒轉彎「篩」出去，結果整到該場兩件落樓，有過危險策騎的案底，攞位謹慎多少冇大錯，不過「勁擊」直路冇位上兼曾受困，的確係影響好大，但輸得近證明目前喺「方」，如果今場一如想像早段會快，就啱佢追嘞！

朝東飛駒上賽有驚喜

　　而第六、七場「同心威駿」和「朝東飛駒」，前駒有幾叻，剩係睇佢呢兩場點贏，都係56秒幾掄元冇花假，如果今場唔係5檔被頂出大外叠，又或無端端放唔出，有權再W。後駒轉馬房後連續兩場跑短只係為開氣，居然上場1200米都追得吓，的確感意外，話晒曾經在一哩撼過「極品絲綢」，上番1800米應該更堅！
　
亨利