馮諾嘉手記：好玩快放稱雄

纯情小彩迷

　　今晚八場賽事喺快活谷馬場舉行，心水場次首先係第二場四班一哩，用「包裝好友」做膽，近仗喺沙田連番跑近，由1400增程跑到1800米都能夠上名，可惜未開齋，反覆試準，今次轉場求突破，初跑谷草並縮程跑較短嘅一哩，抽二檔有利，出閘即可貼欄守好位，有權打開勝利之門。配腳先拖「八哥福星」，上場落到五班跑即刻發威，今場上番四班負輕磅仲有啲優勢。冷腳吼「越戰越勇」，狀態愈跑愈勇，隨時突圍，今次落班再戰，形勢唔同，冷敲無妨。「雄爆」上場增程跑谷草一哩得第三，只輸兩個馬位，試準捲土重來，要兼顧。

原庄人馬再戰

　　第四場四班1200米，「好玩」上場喺同程快放偷襲跑第二，乘勇可戰，仍配蘇狄雄人馬合拍，呢場冇乜快馬，隨時放到，做膽。配腳先揀抽得黃金一檔嘅「得令先鋒」，今次有檔位之助，有番好表現唔奇。上場1000米尾段造快時間嘅「祥禎」，新勝猶勇，當然要拖。冷腳吼呢程有根有據嘅「威振神駒」。

　　第五場三班1200米，馬膽「滙名燈」，至今六戰，最差一次亦跑第四，生性忠心演出準繩，上場初跑1400米，由於排大外檔，被迫用後上戰略，亦後上跑第三，尾段時間好快，今次回師贏馬路程，抽得黃金一檔，出閘後可以擺番喺中前位置，貼欄守好位競跑，對手「跑得叻」抽三檔，相信會放頭，「滙名燈」跟住佢相當好跑。配腳拖番「跑得叻」，近兩仗跑同程都一放到底，上場更大勝亞軍成兩個半馬位，贏來有餘未盡，拼後狀態保持，愈戰愈勇嘅質新馬，機會依然唔錯。其次係「開心自在」，嚟香港只係跑咗兩場，後上追勢都係咁勁，上場同「跑得叻」同場跑第三，已見試準，今場只要克服十一檔，好在呢匹係後上馬，影響冇咁大，場場都出王牌報名，可見練者有信心喺短期內贏馬交代，強配柏寶，配腳當然要揀。「御將軍」前仗贏同程姿態非常輕鬆，回氣一場隨時又可以跑番出水準，要兼顧。