盃賽攻略：近期谷中盃賽醒 東廐搏風之子

纯情小彩迷

　    【本報資料】今晚谷草上演八場賽事，全晚只得一場盃賽，第六場三班1000米五陵會鑽禧盃。睇番近期谷中盃賽賽果，發現告東尼演出極佳，近四匹列陣谷草盃賽之「超勁精神」(兩次)、「正歡騰」及「風之子」均不勝有位，共獲一冠兩亞一季，所以今晚五陵會鑽禧盃，東廐再派「風之子」爭盃要密切留意。

    　上周夜賽告東尼「超勁精神」於香港欖球總會盃追入亞席，之前跑香港會盃又有第三名，早前「正歡騰」角逐義勇軍盃亦只是失運，飲恨跑第二，而「風之子」更順利捧走谷草1000米怡和盃，今晚此駒再角逐同班同程的五陵會鑽禧盃，馬主大可再捧多一盃。

    「風之子」上仗同程排十檔，仍然輕勝今次又碰頭的「尚駿心」逾兩個馬位，加上近四次角逐同程未失獎金，錄得兩冠一季及一個第五，擺明路有專長，只較上仗多負六磅，而檔位則內移至六檔起步，形勢仍然有利，繼續由贏馬拍檔蔡明紹執韁，大可再下一城。

    最強對手固然是「同心威駿」，一連兩仗直領而回，上仗擊敗三班實力指標「馬之王」，原庄由馬偉昌主轡，抽五檔起步，惡氣十足。

永同至尊識跑右轉

　   「勝在分秒」雖然初上三班角逐，但一連三仗同程非冠即亞，最重要是只負一○八輕磅上陣，不難放入一席，有分頭要兼顧。冷腳吼霍利時馬房「永同至尊」，在港兩戰直路賽分別取得第五及第四名，表現有進步。這匹澳洲馬與「福勝滿載」、「披星戴月」同貨源，質素肯定不差，加上在澳洲曾勝出右轉的東奔馬場，有信心可應付谷中，突然間由韋達上陣，相信已屆出擊之時，不可不防。