賠率有路捉：七星仔博你唔信

纯情小彩迷

　　第四場四班1200米，噚日早飛位置大熱居然係梁定華嘅「七星仔」，只得16蚊，仲熱過一檔嘅「得令先鋒」、新勝馬「祥禎」，就算獨贏都有飛，只係得79蚊，真係始料不及，一來隻馬近四次入圍都喺泥地，二來家陣減到42分落班邊緣，鬥志唔知點，試問普羅馬迷邊有信心買到咁熱呀﹖照睇係聰明錢，加上睇番練馬師今季曾經有「快都」唔等降班照博入冷位，而且隻馬上鋪已經喺楊明綸胯下同程追入極接近第五名，既然有強勁早飛支持，小心博你唔信就郁手。

緣是燦爛有景轟

　　第七場「緣是燦爛」自從上年二月後，超過一年時間，連續十四仗不入三甲，加上同場面對「紅跑車」、「士多啤梨」等幾匹惡馬，照計好難睇好，但噚日三點半時位置突然一注打到21蚊大熱，呢注飛出手好狠而且靜靜雞，似乎有人預知今仗會交出好走勢喎。睇番隻馬上季61同70分贏馬，家陣減到63分水平，一定有着數，用勞愛德實有分頭，不妨小注WP玩吓。

熱捧韋達

　　騎師王方面，柏寶同韋達都騎足八場，但後者質與量都比較好，「包裝好友」、「鵬力洋洋」、「紅跑車」同「精彩生輝」都係坐位望贏馬，好大機會封王，十幾蚊係冇肉食，不過真係有買趁手。

周仲