借題發揮：快快手畢業森安理得 頭尾場捧「八寶」

魑魅魍魉

　　繼上個禮拜三，梁定華馬房起孖畢業之後，現時未達標嘅馬房剩低7個，兩個仍未達雙位數W嘅馬房就唔使講住，再數落去吳定強，你真係同佢定啦，亨利人頭博芋頭，佢只欠3場，邊有難度吖！可能今晚已經有嘢睇嘞。而大告自從有「好爸爸」之後，再整場遠征W，基本上運勢唔同晒，3個幾月流流長，執多兩W哪有不可能！？

　　反而徘徊咗好耐嘅霍利時，真係唔知佢個倉咩事？冇聽過佢馬房內部有咩問題，又唔係病毒感染，又唔係人事或兵力有大變動，居然近四個月贏得1隻「聖迪達」，實在呢排佢唔係冇馬出，好似啱啱有8件，但硬係唔知凱旋門喺邊囉！希望佢快啲走出谷底啦。而正常情況下，快快手上岸嘅，應該係黃汝安和胡森，只係差1W，望落今晚佢哋啲馬，有機會齊齊畢業噃。

　　安廐6駒之中，未易配之前，得頭尾場係配馬偉昌，中場嗰4件，唔係績劣就配搭盲門（騎練合作），睇嚟都係戥場居多。如果二揀一，要頭場「八達嶺」，望落佢嘅近績一樣係唔開胃，跌又跌過，又成日喺尾，根本冇咩賣點，話雖如此，隻馬唔係唔做得嘢，又唔係唔跑得，加上分數減到離晒譜，實在唔夠1年前，仲喺四班同程與「喜寶寶」串Q，只要佢有番mood，隨時話嚟就嚟。

　　至於尾場「旺家多寶」，上場初跑谷草就喺一哩入Q，難度其實幾高，無疑呢次檔位唔好，但孭少十磅，計落未必蝕，不妨跟多場。

亨利