阿仙奴反彈旨意李

猪拉多纳

領隊對決 雲格9勝5和1負

今晚英超壓軸戰，李斯特城主場對阿仙奴，風起「雲」湧！雙方領隊雲尼亞里、雲格難兄難弟，上周開鑼戰一齊輸波，今仗更加希望開齋掃走衰氣。講到反彈，兵工廠好有心得，之前3次首輪敗陣後，次輪都可以贏波。最重要係主帥雲格係李城領隊雲尼亞里嘅大剋星，兩人近15次交手，雲格錄得9勝5和1負佳績，平手盤捧阿仙奴。

（Now 621、樂視周日凌晨零時30分直播）

李斯特城上季奇迹捧英超，成為佳話，但話明係奇迹，往往可一不可再。「狐狸」早於開鑼前已打回原形，由國冠盃不敵巴黎聖日耳門開始，到上仗聯賽1比2輸畀升班球隊侯城，已經4連敗，失咗12球，同護級球隊無異。事實上，李斯特城上季全靠打出拚勁，一股作氣奪冠，贏完冠軍後，難免失去呢度氣，恐怕好難再谷得起。
李斯特城連敗頻失波

雖然李斯特城日前終於同馬列斯續約，但始終出售防中尼高路簡迪後，中場攔截力大減，令雲尼亞里防反戰術難以貫徹執行，亦係「狐狸」近期失波數字高企嘅主因，遇上擅攻嘅阿仙奴，防線更加危。

阿仙奴首輪鬥利物浦，一度落後1比4，最終輸3比4，起碼證明球員仲好有鬥心。兵工廠畢竟係傳統勁旅，心理質素較佳，即使出師不利亦有力極速反彈，雲格領軍下，曾經3次於聯賽首輪輸波，結果都可以喺次輪贏波，包括上季主場0比2不敵韋斯咸，次輪作客贏水晶宮2比1。

同埋阿仙奴近4次對李城，取得3勝1和，包括上季雙殺對手。最值得留意，雲格15次領軍鬥雲尼亞里，取得9勝5和1負壓倒性優勢，明顯智勝一籌。雲格仲收到好消息，前鋒韋碧克已傷愈，有望復出，呢位射手上季英超次循環，補時5分鐘入波，助兵工廠以2比1反勝「狐狸」，呢位福星復出，雲格更添勝算。