洪禮賢講馬：「 燈神力量 」準得可怕

魑魅魍魉

　　日前講到「偉感」，不得不提勝出當日嗰場「燈神力量」。唓﹗可能大家會話，Ｑ位着啡燈，今季常發生﹗唔覺有咩稀奇噃。呢點我都知，而「偉感」獨贏臨尾落飛更覺係應份（ＷＰ着綠燈），之但係，奇就奇在正Ｑ着到啡燈嘅組合，原來只得兩瓣，居然係由「年年開心」膽拖「偉感」和「百威紀錄」兩駒。

　　打句問句，賽前度馬，點秤都係兩隻配腳「偉感」和「百威紀錄」上名的成數高啲啩。嘩，始終「年年開心」累積了牢不可破的數據，之前田草0﹕9，盛年之時都入唔到前五名，居然老來嬌，呢次仲入Ｑ﹗

盲門照「啡」技驚四座

　　而更「可怕」的事，在ＱＰ的彩池才反映到，雖則望落成個ＱＰ版塊，好似唔少綠燈啡燈，但實際上只得兩瓣係啡燈，就係1-7和7-14，即係呢場嘅三重彩嗰3個冧巴﹗那一撮人眼光之勁，簡直係技驚四座，尤其在注碼的分配。

　　坦白說，那場跑入三甲之馬，事前未必人人鍾意。頭馬「偉感」以往都未跑過1400米，得唔得難盡言﹔「年年開心」的缺點則上文尾說了，始終響田草跑咁耐未叻過。至於「泰寶馬」，N年未曾在田草上名了（原來亦有兩年半未跑過該程），在三甲馬各有不足大前提之下，閘前可以「啡」成咁，除了寫個服字，仲有咩好講。

　　當然，從來唔鼓吹跟風，畀你跟到又如何，人家「啡」好晒，旁人「啄」唔到幾多，也隨時搭錯車，假如唔係跟到（賭）該場，而係跟了當日第七場嘅「樂意洋洋」，又或是第九場「較量」，ＷＰＱ齊撻，真係連渣都冇啊﹗