馮諾嘉手記：文廐馬實力強 隨時起孖捧盃

魑魅魍魉

　　嚟緊禮拜日快活谷草十場日賽，報名馬已經公布，馬迷們可以初步留意吓自己嘅心水馬。另外，上個賽日三T有成2000萬多寶，可惜冇人中正獎，令到今期三T累積多寶有3100幾萬，估計十蚊一注獨中派彩可高達4800萬，中得到嘅話真係唔使做，大家一定要落足心機刨吓馬喇﹗但係講到谷草賽事，檔位影響都咪話唔細，都係要等到出咗排位，先知三T編咗幾組馬擔綱，同各匹馬嘅檔位優劣。

　　通常高班嘅賽事都會排喺後尾嗰幾場，相信二班1200米馬拉華度賽馬會盃賽都唔會係三T場合，如果係嗰場，就有「美猴王」呢個穩膽喇﹗反而四班2200米長途賽，就有機會係三T場次，呢場匹「勁好友」贏面幾大吓，今季已經跑過好幾場，但試過田草、泥地都落敗，路程由1400增程至1800米，連番試準之後，上場突然轉戰谷草，並初跑長途2200米，強配韋達之餘，賠率亦顯示有信心，排二檔貼欄跑，採用後上跑法，只後係以頸位輸畀次熱門馬「經典能量」，雖然未能開齋，但已盡顯長途實力，今次乘勇再戰同程，賠率當然更熱，WP捧場無大作為，如果真係適逢三T場合，就可以用佢做膽，拖多幾隻腳。同場對手熟口熟面，又係上場奪冠嘅「經典能量」，仲有畀冠亞軍彈甩成個幾馬位嘅「火耀雷霆」同「好歡騰」，上場「勁好友」無疑有內檔之利，而後兩駒排大外檔就有啲蝕腳程，所以呢場檔位優劣都係其中一項重要嘅變數。

美猴王未見底

　　前面提過匹「美猴王」，同樣係文家良馬房嘅參戰馬，呢匹馬真係愈跑愈勁，至今五仗共獲四冠一季，唯一未能奪冠嗰場，就係跑谷草1000米，嗰場亦只係輸頭馬四分三馬位，而四場冠軍都係出自谷草1200米，由四班贏到上三班，仲要次次輕鬆贏馬，上場以大熱門身分贏成兩個馬位返嚟，就算今場上二班都夠實力再贏，憑呢兩匹實力馬，文家良已經大有機會起孖兼捧盃。