低潮藍月亮細盤有回布

猪拉多纳

緊接10點時段登場就有曼城作客西布朗，「藍月亮」曼城頹到爆，包括盃賽已連續6場未贏過，成為領隊哥迪奧拿執教生涯最長不勝紀錄，而且曼城傳出可能換血，難免影響軍心，加上下周歐聯又要惡鬥巴塞隆拿。曼城內憂外患，今仗隨時又陷入苦戰，寧願博中位數2.5球嘅入球細。

（Now 623及LeSportsHK應用程式周六晚10時直播）

世事往往禍不單行，曼城跌入低潮期，隨即連番傳出哥迪奧拿想為球隊換血，包括賣走兩位主力阿古路同大衞施華。兩人一向係曼城支柱，如果連佢哋都地位不保，其他球員就更牙煙，難怪曼城愈踢愈沉，上仗英聯盃仲輸埋畀曼聯，更加打擊士氣。

曼城理應趁今場對西布朗，贏番場漂亮勝仗重振軍心，但考慮到下周中歐聯要硬碰巴塞，估計哥帥今場英超可能會收起部分主將留力，因此唔好以為「藍月亮」會大炒對手。以曼城近3場作客輸晒兼冇波入嘅頹勢，好難咬得入西布朗。
西布朗硬淨頂得兩嘴

西布朗雖然實力差一截，但表現相當硬淨，近5場英超只係作客輸畀利物浦，主場更打和熱刺1比1。況且見到曼城處於頹勢，西布朗搶分信心或多或少都會提升，今場唔怕同呢支豪門周旋到底，戰局隨時呈現拉鋸，捧細盤穩陣。