馬主論戰

魑魅魍魉

勝在分秒捧盃

　　剛戰葉楚航憑「友情友義」、「卡加精神」同「勝任有餘」中三元，似乎谷戰真係特別醒神，今晚繼續強陣應戰，相信又有頭馬見面。先推介跑第七場聖佐治盃嘅「勝在分秒」，近四仗跑谷草1000米獲三冠一亞，演出準到不得了，今次續跑強項隨時再贏。

　　另一匹要留意嘅葉廐馬係第四場「勁辣椒」，雖然在港十戰仍未出頭，但上仗初戴眼罩跑田草1200米表現唔錯，順利放入一席第三，今次轉嚟谷草上陣，話唔定可出頭。

梁廷鏘

勝在分秒錢程萬里再贏

　　谷草賽事向來考馬匹場地性能，揀番有路程根據嘅馬捧場，應該冇錯。今晚鍾意第六場「錢程萬里」，上場跑谷草2200米，響鄭雨滇胯下一放到底，仲破埋全港紀錄時間，都咪話唔犀利，今次再跑同程點會冇贏面﹖

　　另外第五場隻「多多昇」都唔能夠睇小，過往響谷草1200米贏過四場，擺明係路程專家，近兩場跑田草1400米，末段都交出唔錯走勢，證明六歲馬近期狀態喼得唔錯，今次返嚟強項路程出擊，有機會重開勝門，值得留意。

任達華

御將軍補中

　　文家良今季成績真係唔錯，剛戰憑「美猴王」贏馬後，依家已累積三十二場頭馬。今次文廐手馬都幾惡，我睇好佢繼續有馬贏，其中第五場隻「御將軍」就最啱心水，上場響谷草1200米輸條頸畀「滙名燈」得第二，今次兩駒再同場，但後駒就換咗湯智傑操刀，我睇「御將軍」可以反先對手。

　　另外鍾意第四場「得令先鋒」，上仗響谷草1200米輸短頭位畀「七星仔」純粹欠運，今次做足工夫再跑同程，未交代馬鬥志唔使懷疑，開齋在望。

張敬山