洪禮賢講馬：首騎警返嚟喇

魑魅魍魉

　　今期賽事雖然係大賽日，之不過，受到外地火山灰影響，部分外隊馬及騎師都唔嚟得，已經對兩場戲肉有影響，加上呢幾日會持續有雨，當日場地快極有個譜，而好些實力馬一落雨就企晒喺度，譬如「好爸爸」已經係最佳例子，所以兩場大賽唔係冇暗湧﹗

　　講到其餘場次，第六場三班1600米。「首騎警」季初流完鼻血復出跑了兩場，名次唔算特別起眼，都係中游位置過終點，但論到陣上走勢，其實仗比仗進步。當然，前仗係爆缸後首戰，唔可以要求太高，有一段時間冇跑，少不免會手腳生疏，陣上的競逐意欲未必咁強，當重新開氣後，正常情況都會叻啲，但叻啲還叻啲，上賽如果唔係騎者唔夠硬淨，又或當時隻馬好「方」多少，可能已經上咗名嘞﹗

　　事實上，剛仗一如前仗，前中段都係幾落後，但入到直路展現的後勁明顯唔同，如果唔係一度被「品」字形馬林困住，又如果唔係前路曾受阻，要待「本地實力」走開咗先有位上，以之後的衝勢，贏唔贏未知，但「披士」應該幾大機會吧﹗

　　既然一連兩場喼得住跑頭，加上之後在準備上唔使就住，出賽頻率又正常，確認進度重新起莊，好歹季初此程曾輸過畀「印度光輝」和「璐悅」，目前分數大把so﹔外地有晒變化地根據，用番都爾強化埋配搭，以一匹冷門嚟講，整體條件算唔錯，試吓水無妨。