車仔踩油衝刺

猪拉多纳

勝利11人順到冇朋友

今晚英超又嚟倫敦打吡，榜首車路士主場惡鬥熱刺！車仔上仗擊敗米杜士堡後，榮升英超「一哥」，領隊干地改打3-4-3後順到無倫，聯賽錄得6連勝，今晚一定又係派出最強嘅「勝利11人」，喺史丹福橋球場出戰剛於歐聯出局嘅熱刺。論近況同信心，車仔都佔盡上風，相信佢哋可以喺自己地頭拎足3分，1.6倍主勝絕對係信心之選！

（Now 621、LeSports HK應用程式周日凌晨1時30分直播）

今季英超榜首競爭相當激烈，曼城、利物浦都試過做「一哥」，最近就輪到車仔嘞！佢哋上輪作客贏咗米杜士堡後升上榜首，更係英超史上首支連續5場採用相同11人正選嘅球隊，意大利領隊干地自從變陣3-4-3陣式後，車仔就順到依家，聯賽6連勝之餘更保持不失球，加上陣中冇傷兵問題，試問點會變陣！為延續強勢，干地今晚應該繼續派相同嘅「勝利11人」，包括上仗轟入奠勝球嘅迪亞高哥斯達，另外中場發電機夏薩特狀態亦弗，上輪聯賽就係佢第150場正選代表車仔搏殺，加埋今晚主場之利，相信一班藍戰士必定會On Fire搏到盡！

另邊廂，熱刺今仗未能夫添出擊，中堅艾達韋列特因為膝部神經損壞，自從10月起已經無為熱刺上陣，消息指佢本來有機會今晚復出，不過領隊普捷天奴就證實，呢位比利時國腳最終未能趕及披甲，寧願畀佢抖多陣好過。另外左閘丹尼路斯因為停賽要缺陣，而同一位置嘅賓戴維斯又養緊傷，領隊普捷天奴或要改派小將奇雲雲馬夥拍艾歷迪亞擔任中堅。
熱刺歐聯出局傷元氣

熱刺唯一好消息就係射手哈利卡尼復出後，球隊攻力有所提升，可惜佢哋周中歐聯作客輸畀摩納哥，小組圈被淘汰出局，士氣點會好。再者單計得分點車路士可謂贏晒，「藍色勝利11人」咁順無謂拗頸，心水推介1.6倍車路士主勝。