熱刺受讓胸有城竹

猪拉多纳

英超最有價值球會弗到爆

落後英超「一哥」車路士7分、暫時位列積分榜第2位嘅熱刺最近認真威水！除咗獲瑞士著名體育研究機構CIES選出為英超最有價值球會之外，王牌射手哈利卡尼更喺對西布朗一戰中上演帽子戲法，成為英超今季幾位入球名列前茅嘅射手當中，效率最高嘅一位，亦係歷來最快射入英超60球嘅熱刺球員，認真巴閉！今晚佢哋就會作客上輪聯實慘吞愛華頓4蛋嘅曼城，「讓球主客和」受讓一球嘅情況下，相信熱刺贏盤在望，讓球客勝係信心之選！

(Now 621、LeSports HK應用程式周六凌晨1時30分直播)

熱刺今季表現令人眼前一亮，近7場各項比賽取得7連勝，當中更有4場比賽保持清白之身。球隊由開季至今21場聯賽總共轟入43球，只失14球，防守能力冠絕英超！佢哋上輪聯賽憑住首席射手哈利卡尼連中三元，加上西布朗球員嘅烏龍球，以4比0大勝對手！哈利卡尼暫時以13個聯賽「士哥」，排喺神射手榜第2位，僅以1球落後榜首嘅曼聯瑞典前鋒伊巴謙莫域、阿仙奴箭頭阿歷斯山齊士同埋迪亞高哥斯達。仲有呀，中場迪利阿里最近狀態大勇，早前對車路士一仗中更梅開二度，協助球隊喺主場以2比0贏波，同時令對方英超13連勝紀錄斬纜！現時球隊唯一擔心就係後防大將維頓漢喺上場聯賽足踝受傷提早離場，預計要休息6星期，今晚肯定缺陣。
近3次對賽贏晒曼城

另邊廂，藍月亮上輪聯賽作客慘吞拖肥糖4蛋，係2008年中東資金入主以嚟最慘烈嘅敗仗，同時亦係領隊哥迪奧拿執教生涯嘅聯賽當中最大嘅敗仗，平咗上年帶領拜仁時被巴塞隆拿大炒4比0嘅紀錄！咪忘記當時對手係地上最強嘅巴塞，而今次係輸畀愛華頓！賽後好多球迷不滿曼城球員下半場hea踢、放棄比賽，欠缺體育精神。加埋曼城近3次對戰熱刺都係輸波失分，今仗讓球主客和仲要讓一球，相信難逃輸波厄運，心水推介熱刺讓球客勝！