洪禮賢講馬：放長雙眼睇禍福

魑魅魍魉

　　家中嬌妻從事戶外廣告公司的marketing，佢啲客人落得廣告，梗係想有outdoor的效應，該廣告愈多eye catching愈好，但多人睇到又唔代表該廣告深入民心噃，正如我哋或會記得十幾廿年前「15樓養嘅牛牛」呢個廣告，但未必記起啱啱好些汽水品牌賣過咩廣告。呢點就引伸到quality and quantity（質與量）的問題。

　　廣告在質與量方面要得到平衡，才發揮到作用，多人睇而過目即忘，數字再多都係徒然。情況放諸陣上亦一樣（所指係催騎），白德民在「閒話」事件上全身而退，其實大家都預咗，好在今次競賽小組指出佢拉士左臂動作緊促，唔係問完就算，總算出過力﹗

質與量唔成比例

　　其實白德民在該場點止左臂動作緊促，冇錯，佢係打咗十幾鞭，不過質與量唔成正比囉，隻馬內閃還內閃，睇佢打鞭的力度和節奏，可能只係比搔癢大力啲而已。都唔好再去計佢出彎走蝕位，同埋拉士100米佢雙眼久唔久瞄住入面啲馬（未必係「爆冷」嘅﹗﹖）。總之，呢次佢騎唔出佢應有水平就肯定，但係咪差到應該要受罰則見仁見智。

　　剛戰白德民贏出「讚惑」、「飛躍星河」、「高歡」及「飛闖」，盡顯功架，無錯，「讚惑」質素遠勝對手，可能邊一位騎上去都係順利贏馬，但「飛躍星河」沿途取位一流，末段憑其騎功力抗「乘風破浪」﹔「高歡」贏來淡定，全程不慌也不忙﹔「飛闖」全程擺位也應記一功，但記憶所及，今季此君已不止一次引起外界迴響，會唔會次次都走得甩，抑或總有一次出現翻版「多多彩」，我們一於放長雙眼，因為是福不是禍，是禍躲不過。