馮諾嘉手記：引伸波幅省招牌

魑魅魍魉

　　今晚八場田泥賽事，多場形勢混亂，泥戰有根據嘅馬，近仗表現又麻麻，或者係抽大外檔，冇乜集多項有利條件於一身嘅馬，咁嘅情況下，分分鐘連場爆冷。

　　精選場次第三場三班1200米，「時時攞彩」贏馬兩場都係跑呢程，上賽以兩個半馬位彈甩對手，質新馬愈跑愈弗，今次強配柏寶，上三班負磅減輕，可作膽。配腳方面，「超群財星」前仗谷中跑第二，轉投吳定強馬房後狀態已回勇，今場排一檔，出閘可貼欄跟喺領放馬之後守好位，拖腳首選。「馬之王」在港跑過七場全入前四名，場場有獎金收，可惜仲未出頭，馬狀態保持大勇，初跑田泥當然係想取得零的突破，試過泥地大閘一放到底，相信場地啱跑，未開齋實好鬥志，要拖。「一定快」近四仗跑同程獲三冠一殿，上場雖大熱倒灶，但論實力同狀態仍然分量十足，當然要兼顧。

稻庭烏冬收復失地

　　第四場四班1800米，用「稻庭烏冬」做膽，前場跑同程被捧成3.9 倍次熱，早段留後跑，直路上姍姍來遲，畀前置嘅「怒火優勢」走甩咗，只可以追番一席第二，上場跑谷草2200米亦只係輸半個馬位得第四，乘勇再戰，當然係想收復前失。配腳先拖今次再度同場嘅「怒火優勢」，跑過多場草地賽表現都係一般，所以上場田草1800米落敗唔可以作準，前仗喺田泥1800米贏成兩個幾馬位，今次回師贏馬路程，機會重臨。其次係「壽比南山」，近三仗獲兩冠一殿，走勢都非常好，之前曾喺泥地一哩跑近，相信泥地性能唔差，1800米亦最啱發揮，繼續配柏賽，拖埋穩陣。冷腳可吼「全能」，曾喺泥地一哩跑第二，1800米應該冇問題。

　　第八場三班1650米，馬膽「引伸波幅」，近六戰成績四冠一亞一殿，愈戰愈勇，已成為黃汝安馬房招牌馬，剛剛贏完谷草1800米，匆匆再戰睇嚟未收夠籌，泥地賽對手非強，可以繼續省招牌。配腳方面，上場喺同程跑近嘅「和諧大使」，前仗泥地一哩跑第三嘅「寶樹多盈」，仲有泥戰有根有據嘅「銀影激光」，呢三匹馬都有權跑入三甲。