馬主論戰

魑魅魍魉

騰雲駕霧夠準

　　大摩近期真係旺到不得了，剛戰更加憑「勁多勝」、「勁勇士」同「桃李滿門」中三元，試問今次點可以唔捧摩廐馬場﹖最鍾意第十場「騰雲駕霧」，季內四戰獲兩勝兩位，演出夠晒準，今次搵埋韋達操刀，點睇都唔係陪跑格局，有權取得季內第三W。

　　另一匹要留意嘅摩廐馬，係第六場「高歡」，雖然上次只係贏五班賽，但居然可以只跑一條直路就掃晒，加速力一啲都唔簡單，今次升班作賽，改配馬房近期愛將賴維銘，唔可以睇小。

任達華

漸信良駒補中

　　雖然今日賽事以中下班次為主，但各場都有唔少質新馬參戰，估計會鬥得幾刺激。最啱心水係七場「漸信良駒」，上次僅僅輸畀我隻「電訊巨星」，但睇佢終點前走勢如狼似虎，若然跑多幾步誰勝誰負都未知。今次呢隻馬增程跑1400米，肯定更加啱發揮，應該可以輕鬆補中，係全日穩膽。

　　另外鍾意第五場「好運得福」，上次增程跑田草1800米，即刻後上如箭入Q，表現好搶眼，今次再跑同程而對手唔算強，睇嚟都可以贏番一仗。

張敬山

好利利質素高

　　今日我哋隻「霹靂槍」有份上陣，呢隻馬上場放到最後幾步畀「飛闖」追過，未能打開勝門有多少唔抵。今次再跑田草1200米，雖然上番三班跑，但係負磅亦因此減輕，勞愛德騎功唔錯，希望幫得到隻馬，若然可以拉番一場頭馬就最理想。

　　另外推介第九場「好利利」，上場正係與「霹靂槍」同場，負重磅之下仍然追入季軍，對一匹三歲馬嚟講，表現已經算好出色。今次上三班作賽，唔使再負重磅，以佢嘅質素可以橫掃對手。

梁廷鏘