馮諾嘉手記：威威財星擺明有寶

魑魅魍魉

　　柏寶上個賽日有多匹餐士馬，最終只得「甜蜜至上」贏馬，其餘有六場跑P，睇嚟手風唔多順，但整體嚟講近期已有唔少頭馬進帳。今晚兩大師傅手馬都有勝算，韋達雖然騎足八場，但多匹戰馬抽排外檔，柏寶七匹坐騎亦有三匹排檔麻麻，谷草賽事檔位影響大，尤其係C欄，睇吓佢哋點走位爭取頭馬。

太陽昇中檔放到

　　精選場次第四場四班1200米，呢場有五匹馬上場贏過，其中「太陽昇」、「好運精選」同「百利旺」贏嘅係四班賽，值得睇高一線。「太陽昇」上仗贏同程同樣係跑C欄，外檔起步後切入內欄領放，一放到底爆半冷W，走勢甚佳，今場排七檔，要擺前跑更易，做膽。「好運精選」上場贏田草1000米，今場改配主帥都爾，回師谷中冇問題，配腳首選。「百利旺」上場同程爆出13倍半冷W，贏得清脆，今場當然要拖。拖多匹「超勝」，季內雖未嘗一勝，但同韋達特別合拍，至今唯一頭馬由韋達建功，今季有三場亞軍亦係出自韋達之手，今場人馬重逢，當然要兼顧。

　　第六場三班1000米，用「威威財星」做膽，上場十檔起步亦由頭放到尾，以短馬頭位擊敗柏寶坐騎「再來風」，有幾犀利柏寶一定好清楚，難怪今次升上三班亦肯騎，負磅更輕，有權冧莊。配腳先揀兩度喺同程入位嘅「此時此刻」，上場大熱僅不敵「勁勇士」獲亞軍，對手再出再贏，可見水準高。「延續美麗」上場初跑谷草，配梁家偉輕飄飄，可惜直路彎外閃而屈居第二，今次強配韋達求收復前失，值得重視。揀多匹「應變計劃」，上場跑一班賽對手太強，落敗唔可以作準，今場回師三班，形勢變得有利。

　　第八場三班1200米，馬膽「風之子」，近仗跑谷草1000米獲兩贏三位，睇贏馬走勢後上力強，相信增程跑1200米更合適。配腳先拖前仗贏同程嘅「包裝猛將」，其次係在港七戰全入前四名嘅「超群如意」，仲有「如日方中」，上場初出跑田草1000米直路賽走勢唔差，轉戰谷草對手較弱，熱過身有權入圍。