朝早有動靜：文家良緊張美猴王

魑魅魍魉

　　昨朝加課期，由於有八組馬試閘關係，多位大師傅慣性於六時許才露面，早段場面較為平淡。練馬師方面，以胡森、葉楚航及文家良備戰最積極，不停穿梭烽火台與機坪之間督操，動態頗具瞄頭。

　　文家良今戰三匹參戰馬中，列陣第七場一班1200米的「美猴王」當然屬焦點所在，過往五戰同程全勝，今次再踏上征途，能否再闖高峰當然跑過至知，但可肯定的是幕後戰意激昂，自上仗之後，文家良經常跟實此駒出出入入，當正是鎮倉寶，昨朝練者更與柏寶密斟一輪，單睇兩人動靜，今戰必定搏甩髀，可以放心捧場。

　　另外，胡森馬房亦有搏殺動靜，昨朝當「重量級」、「龍的傳說」等駒出操時，一早已見到練者親自在旁監督，其後更走上烽火台頂樓全程吼實，並趁試閘前空檔捉住潘頓雞啄唔斷，肯定又有搏殺意圖。

　　今戰胡森與潘頓合作兩駒，其中列陣第六場三班1650米的「重量級」，此程累積五冠一亞佳績，足見路有專長，然而因上季拼搏過甚，以致評分飽和，故季內一直處於調整期，上陣十次也未能交出頭馬。不過臨近季尾，此駒工夫明顯加強，早前試一課泥地1200米大閘，走來有前有後，埋門拍跳勁力十足，狀態有復甦感，今番續爭強項谷中1650米，排得一檔起步要提防。至於出爭第五場三班1800米的「龍的傳說」，最近連仗跑得接近，慢熱馬已有山雨欲來之勢，今番易配潘頓操刀，也有一敲價值。

韋柏