賠率有路捉：帝豪龍駒有玄機

魑魅魍魉

　　第六場三班1650米，「帝豪龍駒」流過鼻血，兼且未贏過三班賽，邊有可能熱得過新勝馬「靚到爆」同落班嘅「好兄弟」，但係佢居然WP成為大熱，45蚊W，14蚊P，比較上仗十一倍，飛數似乎話你聽今晚好有信心。其實隻馬一向鬥後勁最好，上鋪杜西奧客串不留而放違反馬性，輸唔可以作準。睇飛相信今晚留住嚟跑，只有交出早前力追「好德煌」嘅水準，邊有馬擋得住呀﹖

龍的傳說墊底飛勁

　    賠率古怪仲有「龍的傳說」最近三戰都跑梗頸四，WP齊撻，比人感覺材料係咁上下，喺三班唔係咁易贏番場，邊有人會估到噚日早飛，呢隻馬居然WP大熱，41蚊W，17蚊P，睇飛完全唔驚「旺舖福星」同「星際雄師」兩匹近況唔錯嘅馬，好明顯呢注墊底飛唔係出自普羅馬迷。雖然飛數嚟得好意外，不過睇番匹馬賽績，絕非冇迹可尋，事關最近兩仗同程跑第四，沿途都喺外叠競跑，蝕盡位之下都只係輸少少，今晚抽一檔形勢非常好，再配合埋噚日呢注早飛，肯定有計，信得過。

騎師王熱捧柏寶

　    騎師王方面，今晚韋達停賽，柏寶接手谷草王「美猴王」，加埋「千兩寶寶」同「大進」兩匹質新馬，邊線馬又有「鉅業光輝」同「好兄弟」，應該足以登上騎師王，十幾蚊有買趁手。  

周仲