馮諾嘉手記：奄尖大少趁弗再捷

魑魅魍魉

　　終於返嚟快活谷跑夜馬，今季最後三次賽事，有兩次係跑谷草，谷戰一向係方嘉柏天下，嚟緊呢兩次谷戰柏寶必須把握機會先至可以重奪領先地位，但睇今晚韋達同柏寶嘅坐騎陣容，後者冇明顯嘅優勢，整體嚟講韋達手馬強得多，似乎人緣唔錯嘅韋達，近排特別多支持者，佢頭四場咁啱都騎三號馬，都有一定勝算。

　　精選場次第四場四班一哩，用「奄尖大少」做膽，季內跑過多仗，前仗第一次配韋達同程跑第三，上場原班人馬乘勇再戰終於開勝門，難得季尾開竅，一定趁弗爭連捷。配腳先揀七歲馬「駕馭」，就快兩季冇贏馬，最近連續三仗跑同程都得第二，狀態雖然保持，但經常遇強敵，惟有作配。「睡得好」在港跑咗廿一場，上場差唔多落到四班尾，唔少朋友都話呢匹馬係時候瞓醒，結果只係以個半馬位之差得季軍，今場再接再厲，要拖。要埋「尚感」，上場跑黏軟地後追爆大冷 W，走勢相當吸引，今場亦唔可以忽視。

此時此刻1000專家

　　第五場三班1000米，「此時此刻」在港跑五場都係呢個路程，共獲冠亞季各一，上場跑黏地雖敗亦得第四，今場排三檔唔曳，只要克服重磅，贏馬唔難，做膽。配腳方面，「勁勇士」近四仗跑呢程表現非常神勇，共獲三冠一季，上場排十檔兼起步漏閘，形勢不利之下仲可以入位，今次排四檔，應係前列分子，拖腳首選。「常山鳳寶」新勝猶勇，今場雖然升班角逐，但睇佢上場喺四班贏兩個幾馬位，姿態好輕鬆，今場上班孭輕磅，絕對有力一戰。冷腳吼「皇仁神駒」，雖然近仗表現麻麻，但今場韋達肯騎，磅輕要防。

　　韋達今日手馬實力較強，但第八場三班一哩嘅「銀太陽」，係柏寶最具食胡本錢嘅坐騎，今季大部分時間減分，近兩場喺三班跑同程兩度得亞軍，都係放到終點前一兩步僅僅輸，今季仲未交代，用柏寶鬥志鮮明，做膽應冇錯。配腳先拖連番喺同程入位嘅「旺家多寶」，亦係求開齋嘅馬，實好鬥志。「紅跑車」上場跑第三，「歡騰」則新勝猶勇，都係當弗嘅馬，要兼顧。