洪禮賢講馬YIN''''S TALK ：重量級配件幫到手

港陌

　　往績結構之重要，在於我們可依循馬匹的既定模式，唔會「趨凶避吉」，從而提高命中機會。假如盲椿椿去捧，明明該駒變化地性能水皮，落住雨跑你都敢捧場，又或者隻馬冇欄冇命，排着十二檔你仲話好分要買，形同擔沙塞海！就算像前文提到嘅「喜在心頭」及「超力好」爆攤例子，出現的密度並不多。

既定模式具參考性

　　冇錯，佢哋去到中年才爆攤（贏完再出仲有Ｐ），真係盡破累積經年嘅數據，或許那役會令你錯過了下注良機，另一方面，之前多年所省卻嘅注碼，計落可能仍有數圍，所以馬匹既定模式有佢嘅價值。

　　說到「喜在心頭」及「超力好」，在可見將來，會否繼續爆攤，冇人敢下定論，可一可再？定係偶發性？若是依據往績年復年嘅經驗，贏完冇影嘅風險依然高。但如果閣下喜歡高風險的投注，此類馬正正適合拗頸。

　　拿來往績具穩健性之馬作據，「重量級」去季好似同我們玩捉迷藏，跑了11場，統統係谷草1650米，冇乜飛試過跑得唔好，但亦曾以廿幾倍冷門身分上名，證明唔關冷熱問題。而排檔好唔好，佢都曾經冇影，似乎又同賽事形勢扯唔上關係。

　　回看此駒兩場上名的共通點， 簡單嚟講， 配件作怪，因兩度入三甲俱有開縫眼罩（初戴及重戴），其餘數仗名次通常幾後。

　　姑且信係配件幫到手，那麼就算錯過了季初首次用開縫眼罩的機遇，季尾10倍冷W，一定中得應，乜仇都報晒！