洪禮賢講馬 YIN''''S TALK：無定向賽績冇路捉

猪拉多纳

　　有啲馬贏完之後冇影；有啲馬未贏之前又冇影；有啲馬成季剩係得贏嗰場喺度，其餘一概失蹤！

　　上述三類馬，之所以出現「可怕」賽績，會唔會係練者部署的心思，如果一場半場係咁嘅模式，我都仲信係人為因素，但如果成季都係咁，人為的因素冇咁大控制力吧！

　　先講剩係得贏嗰場喺度之馬，上季比較驚嚇的例子有「經典再現」，去季初還在摩廐， 一出即於田草1600 米輕勝， 惟之後就咁?！連跑10場冇Ｐ，其中有７場更喺尾列過終點，就算季中轉到呂廐，情況也沒有多大改善（僅煞科賽得殿軍）。如果話上手馬房摩法幻影得咁厲害，斷估亦唔會贏完後， 名次會愈來愈曳，仲係曳到完全脫離晒現實嗰種。

高耀之威最經典

　　至於，講到贏馬前或後冇影嘅case，「高耀之威」上季敢認第二，邊有他駒敢認第一，而佢仲係包辦晒前前後後都冇影嘅例子，季初第二仗勝出1600米，但之前嗰場仲跑緊包尾（1200米）， 而贏完翌仗轉到1400米，又包尾，所負距離一如首仗一樣，超過10個身位。

　　到了季尾階段，入Ｑ的前後， 都係跑谷草1650米，名次為9-2-12，點解入Ｑ後大敗，呢次同無定向性格冇關，因為痰作怪而已！至於季尾復出， 改跑田草1600 米， 則繼續跑第12名，並無出現忽然轉好現象。如果我們遇到上述馬匹，捉唔到有咩奇，反而捉到仲要感恩呀！