洪禮賢講馬：史無前例季前活動

港陌

　　馬季開鑼前，馬會總有一系列的宣傳活動，藉以喚起馬友們的注目。

　　雖然目前唞暑期話長唔長，但都唔係三兩個禮拜貨仔（唔計開操日子），馬友的賽馬神經hea咗一排，餓馬還餓馬，要頓時令佢哋投入番，話易又唔係易，所以宣傳就算唔鋪天，都要達至蓋地吧。

　　望一望呢排馬會的新聞稿，及有關的廣告，周圍都睇到嘅，自然係「馬季開鑼．激情釋放」。如果有click入過馬會網頁，瀏覽關於開鑼嘅專頁，就會睇到更多、更詳細的安排。

　　咁，最實際梗係開鑼入場有咩送？上季就有座枱兩用月曆（自己成季都係用緊呢個），今季最整夠兩樣，既有月曆，仲有埋枝月曆筆，比數1：2，今季送禮安排先勝一仗。

韋達柏寶齊出席

　　此外，下周二有個名為《馬季開鑼開運Show．星級騎練簽名會》的特備活動，一如該新聞稿所指，真係破天荒噃，事關當日韋達及柏寶，兩位長期雄霸騎師榜頭兩位嘅明星，將會齊齊撐場，到時會講咩，真係唔知？但斷估唔會問佢哋開鑼有邊隻贏得， 就算真係咁問，根據賽例，都係唔可以透露！而這個活動尚有不少有睇頭的嘉賓，如馬王「蓮華生輝」練者姚本輝、冠軍見習生楊明綸，以及風水顧問和運財之星等等（會後仲有簽名及送禮安排），總之呢個活動在近季嚟講，的確係幾「出」。

　　剩係請到兩個巨頭出嚟，又講嘢又簽名，如果冇記錯，應該係史無前例啩！？

洪禮賢 馬會賽馬節目主持