朝早有動靜：柏寶文家良好傾

港陌

　　上個馬季七月中才結束，但轉眼間新季即在周日展開，各路人馬均已先後露面，埋門所見，部分騎練均做好準備工夫，希望能於開鑼日旗開得勝，攞個好意頭。

　　上周六遠征澳洲無功的柏寶，昨日已投入操練，並先後替賀賢及呂健威等馬房操馬，亦跟文家良在烽火台傾過不停。其中他策呂廐「天之驕子」彈草閘，並以杜利萊坐騎「輕輕鬆鬆」作伴。上馬前柏寶早在沙圈等候，試後又找呂健威有商有量；此駒已報爭周日四班1600米，已露動靜之馬要吼。

　　另外，大摩主帥白德民自返回工作崗位後，朝朝上馬落馬認真勤力，而昨晨亦是一樣，約七時許，已報爭特首盃的「新力勁」便由他於草地彈閘，單跳兩段，老馬試來有火有力，走勢十分硬朗，課罷更見白德民左睇右睇及細心檢視馬身，似乎有計。

韋柏