洪禮賢講馬：戰士 加罩搏命

猪拉多纳

　　第六場四班1650米。「多贏勁駒」季前打好個底，一如大部分何廐馬一樣，初出已經跑得好好睇睇，何況1200米路程對佢而言，真係嚴重偏短，有本事開段廿二秒幾拉士，直路爆到上嚟，根本係超難度動作，所以唔好介意鬥衝之下，佢畀隻「自由勝」後發先至；開完氣正路咁安排跑番一哩，打埋王牌更似樣（3場王牌賽事為10倍W以下，2次上名），而此程早有上名紀錄，路程有晒證明，加上跑低半班對手唔同晒，應是開齋良機。

　　第七場三班1200米。「戰士」試跑向來係比較sharp醒嗰類馬，冇配件輔助一樣可以輕易交出快時間，而近試所見亦有此模樣，兼且快得嚟冇話躁。至於試大閘的表現，沿途要迫吓先肯走，主動性不足，或因此有重戴眼罩的需要，姑勿論係咪呢個原因所致，總之過去佢3次配備有變一一上名，轉變對隻馬嚟講，點都係好事，而B欄1檔亦有先天優勢，呢匹初出例入圍之馬，做膽應可靠。