數據人生：心路轉倉即變身

魑魅魍魉

　　李易達馬房唞暑期間流失多駒，而馬圈離合其實早已司空見慣，一般除了馬匹表現未達馬主要求外，很多時候便是「因財失義」，如馬匹捧成熱門即失準，但賠率冷落練者口氣麻麻，陣上演出卻又生龍活虎，馬主有被愚弄感覺，自然有權將名下馬轉由其他練馬師訓練。

　　今晚出戰第三場五班1200米的「心路」，來港後隸屬李易達馬房，前季初出評52分跑四班田草1200米，即在巫斯義胯下僅負頭位予「連利精英」跑第二；露光後該季再跑七次，每仗亦有票數支持，可惜卻只多添兩席亞軍，但至少證明居四班肯定有贏馬能力。不過，上季十一戰全不入Q，只在季尾於谷草 1200米以26倍殺入第三，結果唞暑時轉投方嘉柏馬房。

　　要留意的是，該役「心路」初跑谷草及排十二檔，配潘頓亦須負132磅，最終後上甚勁入圍，負於受讓十二磅及全程跟前居好位的「勁駿」個多馬位；這次兩駒又同場，但「心路」排四檔及改配何澤堯實負119磅，反而「勁駿」排十二檔兼要讓前駒7磅，加上六月至今方廐馬於谷草B欄1200米的成績甚佳，可見這次轉倉初出已有變身之力。

　　對手方面，何廐開季後氣勢如虹，「勁駿」要兼顧；另外，「齊鼓掌」佔熱身之利、「智勇雙全」賽前谷閘跑第三已試準、「團隊福星」上周三同程得第二兼排一檔有利，均宜留意。

歐陽志恆