馬主論戰

魑魅魍魉

多贏勁駒熱夠身

　　開鑼至今跑咗三次馬，何良已先後憑「健康藍莓」、「連戰連勝」同「陸豐福星」贏咗三W，成績唔錯。今晚何廐都有惡馬，繼續有頭馬見面絕對唔奇，最睇好第六場「多贏勁駒」，季內跑過一場1400米得第四，已經熱夠身，今次轉嚟谷草一哩上陣，睇怕都係時候贏馬交代。

　　另一匹何廐馬要留意「奄尖大少」，以往跑過四次谷草一哩非勝即位，擺明係路程專家，今次初出即跑強項路程要吼實。

張敬山

祥禎無懼排外檔

　　上次推介嘅「天瞳」順利贏咗，臨場居然仲有14倍分頭，都算唔錯。今次都一樣向有分頭嘅馬埋手，先推介第五場「祥禎」，上季兩場頭馬都響谷草 1000米取得，兩次都係用後勁追過對手，今次吼準強項路程再跑，雖然排響十檔起步，但對呢匹後上馬影響唔大，可以捧盃威番一次。

　　另外鍾意第七場「高飛飛」，上季尾已順利打開勝門，證明戰鬥力唔曳，開竅後戰鬥力隨時再進一步，咪睇小。

任達華

星際雄師食尾胡

　　大摩剛啱憑「騰雲駕霧」開齋，睇嚟旗下馬狀態開始嚟，今次摩廐繼續行精兵制，只派兩駒上陣，但都有留意價值。先講尾場「星際雄師」，大摩接手後已取得兩W兩P，七歲馬戰鬥力重上高峰，今次跑一哩排三檔起步，即使用白德民都唔使孭太重磅，計落絕對有可勝之道。
　
　　另外第七場「海王子」都要留意，上季一出即勝，證明唞夠跑威力特強，今次搵嚟馬房愛將勞愛德操刀，點計都唔係陪跑格局。

寇鴻萍、梁廷鏘