楝悉先機：極速寶寶 執正即食

猪拉多纳

　　賽事進入第5期，剩低4個馬房未有頭馬到手，分別係文、蔡、蘇及鄭廐，若果以今次上述4廐的兵團嚟講，當中以蔡約翰馬房最令人期待，如果都開唔到齋，一定成地都係眼鏡！但有時唔到你急，一季流流長，季初階段未上力，有時唔係剩係得馬匹，馬房亦都係，所以一啲都唔奇。又要語重心長講多次，平常心玩馬最緊要。

　　第四場五班1400米。「極速寶寶」上季去到季尾先至熟啲，已經可以一再上名，證明唔係冇能力，不過，嗰兩場賽事仍然見到隻馬未搞好，有時會出閘慢半拍，又有時末段衝落會斜跑。希望經過暑假，進度上更理想，教好晒隻馬，季內首仗就掹到柏寶，係即食格。

按得醒內檔形勢好

　　第六場四班1400米。「按得醒」上季同程取勝一役，姿態甚出色，翌仗轉到1600米，純粹輸形勢，亦可能係氣量問題。今季復課幾早做嘢，睇手法想早早爭取表現；今次肯揀此程而唔報同日1600米，安排實實際際，而排到內檔起步，預計可守到好位，有埋幾匹快馬同場，唔使焗放，形勢唔會差，何況有賠率，仲抵買。

　　第八場三班1600米。「一言為定」公認係超級馬，三班唔會留得住，最終上到二班定一班，阿棟睇上唔睇下！講到今次機會，做晒大閘先至出賽，有晒出擊部署。只負118磅，對住大部分班內普通貨色，優勢頓現，除非今場出現早段慢鬥慢的局面，先至會不利此駒，如果步速正常，唔會有邊匹馬後勁好得過佢，賠率熱到辣手都冇法子！

陳華棟

點買法

　　睇番今日賽事整體形勢，似十足係攞膽易，配腳難格局， 隨時又似啱啱禮拜三咁， 硬係三甲之中，會整隻無厘頭冷腳，所以，與其最後口糠糠，不如簡簡單單買3匹馬獨贏過關好過嘞！一於熱門win 3x4，寧願買大一注好過， 費事陣間買Q 有膽冇腳，得個恨字！