洪禮賢講馬：歡呼星上場際遇曳

博彩老头

　　柏寶周四騎9場，初步睇落有餐士嗰幾匹馬，都係集中在賀方兩廐，像「野馬」、「心路」、「鎖定目標」、「歡呼星」等，有冇機會出現大手交易，成數唔係冇，不過，佢除咗首日贏3場之外，跟住幾期真「濕滯」！係就係期間有兩場頭馬到手，8/9仲贏過匹大熱門「開心動力」，但最近3期嗰7匹大次熱門就「慘烈」嘞！冇1隻贏到，已經令一眾擁躉「嘔電」，當中更只得「父子兵」有P，好明顯近期佢嘅熱門保衛者本色，同季初首兩回合完全唔同晒，希望呢次會「重納正軌」。

　　至於柏寶芸芸坐騎之中，筆者對第九場二班賽「歡呼星」最有好感，一切源於兩點，其一，自從上季笠咗眼罩之後，跨季7場未甩位置，攤路一日未斷，仍有憧憬價值；其二，剛仗陣上際遇差到痺，出閘即畀內外側兩駒夾咗三兩秒，途中又因緊迫競跑，一直處於好被動嘅包尾位置，入直路仲要左搵位右搵位，去到拉士百幾米先至真真正正騎得到，衝幾步就入Q，睇完咁嘅過程，覺得佢好本事。

　　「歡呼星」今次轉爭谷草1650米，係未跑過，但贏過田草1600米，理應啱發揮，而賀賢打得王牌報名兼用埋柏寶，料有補中決心。