賠率有路捉：早飛硬淨真係寶

猪拉多纳

　　第五場四班1400米，13 匹參戰馬都揀唔上手，唔少仲從未上過名，「真係寶」就係其中一匹。呢匹巴西自購馬喺香港兩季十三仗不上名，但出奇地噚日早飛成為53蚊大熱門，位置24蚊，真係唔知何方神聖咁有信心。

　　睇番隻馬上季最後一仗，喺谷草一哩排衰位十二檔都放得有聲有色，跑第五輸三個馬位，證明喺四班一定站得住腳；評分由初期93分減至家陣48 分，實有着數，加上白德民唔放手，隔夜飛又咁勁，小心有料到。

　　第三場四班泥地一哩，「越戰越勇」去季表現又係乏善足陳，出賽十一次連P 都冇，經常係幾十倍大冷門，證明隻馬未到位。但上仗復出角逐田草1400 米突然有飛，只得7.5倍，陣上亦有活力，後追跑第五，似乎有人知道距離出頭日子唔遠，落定飛先。噚日呢隻馬更加聚飛，只得58 蚊W，25蚊P，明顯有關人等有把握今戰可以開齋喎。

騎師王博杜利萊

　　騎師王方面，韋達同柏寶都熱唔透，開盤手暗示佢哋冇餐士；反而杜利萊開飛得7倍明顯偏熱，呢位法國好手今季只得一W，手風唔太順，但今日手馬好強，「爆發力」、「信賴」、「八發八中」及「旅英駿駒」都係坐位望贏馬，應該可以攞到分，半冷門絕對博得過。

周仲