楝悉先機：天久恃輕升級

魑魅魍魉

　　呢期國慶日賽事，加上沙田馬場大場面，未必爆得咩出樣，事關四大馬房蔡約翰、大摩、方嘉柏及告東尼，各有強兵在手，連場埋牙嘅鏡頭應該少不了。以阿棟嘅睇法，方仔同蔡神仙手馬最有實力，有好幾場賽事，佢哋嘅馬都係贏面壓一，如果冇番三兩場頭馬貢獻，一班捧場客仔唔慌有好收場！

　　第五場三班1000米。「軍策令」上場唔係冇飛，但名次落後，主因係出閘唔好，跟住嚴重失蹄，細路仔唔落樓已經好彩，由於人馬驚魂未定，令早段比較落後，就算之後跟番上都冇用，跑輸唔使介意。輸完上場，3日就轉馬房，咩原因，我唔知道，但轉得飯鑊梗係想攞成績，今次矛頭對準直路賽，安排啱晒，可捧。
　　
　　第九場三級賽1400米。「天久」係不可多得嘅良駒，來港7場不勝有位，表面上，今次喺級際賽將面臨好大嘅考驗，但由於讓磅賽關係，113磅會係一大推動力。難得柏寶肯捱肚餓造磅，誠意有晒，一定有戰意，呢匹當起的年青好手，有望打叠再贏。

爪皇盛水加程掂

　　第十場三班1400米。「爪皇盛水」比賽中走勢不規矩，仍然未成熟，但初出一樣跑得好，證明實力，不會在三班沒有出頭天。跑了一場之後，肯加程嘗試，睇得出練者有心想早早交代。查番隻馬外地贏1300米，加程只會有好冇壞，唔排除日後連1400米都未夠喉，再跑落去可能路程會更長，氣量或扳至 1800米，呢點要記低。

點買法

　　正如開場白所講，幾大馬房屯重兵，今日買W 唔好刻意求冷， 熱熱哋希望乘埋搵到餐晏仔。比較上，我鍾意第九口孖寶，「天久」搭「爪皇盛水」，一注搞掂。至於買Q 心水場合， 都係第九及十場， 最主要原因係呢兩場形勢好似簡單啲，易啲捉摸。