馬主論戰

港陌

好玩神駒開勝門

　　黎海榮剛啱騎「極奇妙」響日本贏馬，可以話騎功同運氣兼備，我睇好佢今晚都有馬贏。最啱心水係第三場「好玩神駒」，上場響谷草1200米突然交出走勢，輸畀頭馬「千兩寶寶」唔夠一個馬位，證明戰鬥力唔曳，今次再跑同程，應該可以順利打開勝門。

　　另外鍾意頭場「野馬」，上次改用留後跑法走勢出奇咁好，如果柏寶今次沿用上仗跑法，要響度贏番一場唔難。

張敬山

跑黏地超勁精神

　　呢兩日都有落驟雨，刨馬時不妨吼吓啲游水馬，好似第六場東廐「超勁精神」嘅變化地性能就好突出， 上季唯一頭馬，正係響黏軟地上取得，今季已經熱過身，如果臨場真係有雨，隨時可以憑場地性能掃晒。

　　另一匹游水馬可吼尾場「金紫荊」，上場響軟地一放到底爆冷贏馬，令人印象深刻。有前速嘅馬，今次排12檔起步都冇有怕，若然臨場有賠率就更加抵博。

任達華

方嘉柏谷戰當旺

　　谷草向來係方嘉柏嘅福地，開鑼只係一個月左右，佢已經響谷草贏咗七場頭馬，真係唔到你唔服。

　　今晚一於吼實方廐馬， 先推介第二場「當旺」，上場響谷草1000米放得似模似樣，今次用到柏寶操刀，點睇都唔似陪跑格局。

　　另一匹方廐馬要留意第五場「寶貝王子」，今季一出即勝，證明狀態嚟得好快，雖然上仗表現令人有啲失望，但五歲馬現時評分肯定未盡，隨時施回馬槍。

寇鴻萍、梁廷鏘