楊明綸勁冷騎師王

魑魅魍魉

將於11月7日代表香港出席澳門國際見習騎師邀請賽的楊明綸，昨午憑一對蔡廐馬「越跑越有」及「勁高手」順利起孖，力壓同得32分的韋達，爆出150倍大冷（頭場開跑前賠率）成為騎師王。
       
越跑越有突如其來爆出28倍冷門。

仲記得喺上季初，蔡約翰就講過會支持見習生楊明綸，點知雷聲大雨點小。不過到咗今季，蔡神仙似乎記得呢個承諾，早排先彈隻冷馬「賞惑」畀綸仔建功，尋日仲靠綸仔操刀嘅一對冷馬「越跑越有」同埋「勁高手」起孖，兩隻2串一乘埋有299倍，綸仔絕對做咗蔡神仙嘅冷殺手。
       

對於「勁高手」升班面對強敵依然連捷，蔡約翰就話呢隻馬只係學嘢慢少少，依家先叫成熟，喺三班仲有機會贏馬。「越跑越有」今次跑番啱腳法嘅一哩，順利開齋好合理。綸仔依家有44場頭馬，仲差一W就升格做五磅仔。
       

蔡廐兩W都無佢份嘅韋達，周日將遠赴日本客串一天，夥拍「網絡電郵」出戰東京馬場舉行的日本秋季天皇賞一級賽，將缺席當日的快活谷日賽。
       
越跑越有馬主冇嚟

尋日「越跑越有」爆冷贏馬，為馬主張宇人議員帶嚟呢場久違咗嘅頭馬，不過響凱旋門影頭馬相卻未見其人，只得佢老友何世柱，同埋佢甚少露面馬場嘅囝囝張士宗，代拉頭馬。今季佢老友鄭強輝名下「萬子千紅」兩W，都係由佢戥人高興代拉頭馬，反而呢次名正言順自己贏馬，又輪到好友叨佢光，真係何其巧合！據張士宗透露，老竇今期無入場，原來係身在美國嘅妹妺月初結婚，張宇人伉儷作為主婚人，早於月頭已飛咗去美國。