借題發揮：大事化無 打爭氣波 巫斯義開心自在

猪拉多纳

　　「鎖定目標」引起的迴響有幾大， 大家心中有數， 話之你係80後、核心馬迷、業內人士，邊一群都好，嗰場跑得啱唔啱，心裏已有答案，只係講唔講得出口！但反正都判咗，噏乜都冇用，鬧完嘈完，啲馬迷一樣乖乖返嚟幫襯，冇咩大不了，同埋，嘈到反轉又點，幫又幫唔到，冇人罰，冇水回，呢幾日咁凍，留啖氣暖肚好過！

　　如果用「知恥近乎勇」形容巫斯義其實唔多貼切，因為佢呢排喺本地同出埠都有馬贏。而筆者成日都覺馬圈幾得意，但凡有咩大事，尤其係騎師，只要佢「化險為夷」，嗰輪點都爭氣啲，是故，阿巫今日揸咗咁多方仔嘅馬，好似主帥一樣，係時間交功課啦。

　　先講「私家路」，轉咗馬房演出咁準，今次谷戰貿貿然過江，冇理由想攞嚟衰！？「開心自在」上仗唔夠態，依然追得唔錯，證明分數有利，熱完身仲唔搏咩，同埋，一向心急交代嘅方仔，手法唔鍾意等。而「智友」上仗入Q唔算發揮得好，肯強配，擺明一條心。

Jack