洪禮賢講馬：馬偉昌要多謝鄭雨滇

博彩老头

　　日前馬經版頭條係關於落飛黨，其實唔好話嗰批客係咪猖獗、搶錢，大家都係錢博錢，一樣有風險，只係佢哋注碼多、覆蓋面夠闊，引起外界迴響自然大。如果睇番季內落飛黨嘅「足印」，不論田谷都成日見到，但瘋狂程度總覺谷草犀利啲。唔使比較田谷兩地賽事出啲咩馬、甚麼偏差、模式利放利追等等，出現呢種現象，都係機會率作怪，剩係講連贏位，田草出足14駒，中Ｑ機會率係1/91，谷草12駒則係1/66，差咗一大截，畀你係局內人，長玩會揀邊便去勁「啡」，都唔使多講。

　　講開谷草，日前尾場賽事馬偉昌畀人鬧爆咗，「睡得好」變咗瞓唔着 ！ 當然，個人唔會懷疑佢有任何暗黑動機，因為如果咁夠膽喺終點前出蠱惑，等同想自己執包袱。從賽後報告所指，佢話隻馬內斜，所以停鞭，修正後再開鞭，但隻馬怕鞭，因此繼續揮動馬鞭之際，持續手足並用力策。

　　就讓我們放下怒氣，唔主觀咁閱讀呢場賽事，信佢只係打咗三兩鞭，就feel到坐騎怕鞭，亦因為內閃影響到佢直路中段唔係好騎得到，之不過，有兩點唔係好解得通，第一，馬偉昌修正坐騎後，明知隻馬怕鞭，點解仲要打？第二，臨尾持續手足並用力策，但睇佢推騎嘅力度，好似未去到頂點 ？ 而呢次佢冇被罰算係執番身彩，亦都要多謝阿滇，假如「闊袍大袖」再遲啲先擺正軚，終點前先僅僅冚過「睡得好」嘅話，三兩日應該走唔甩。