洪禮賢講馬：旺國手換人要吼

猪拉多纳

　　第六場三班2200米。「旺國手」今季狀態嚟得早，唔似得對上3季，至少要跑到12月先識上名，由於現階段處於拼搏期，出賽時間表又校得好，唔應該會出現突然掉頭回落情況；上場1800米唔係因為喺安全男（馬偉昌）手上，斷唔會11檔起步後沿途處三叠，而出彎一程仲要畀內側白德民「頭盤」擯開再蝕啲，剩係呢兩處敗筆，其實足以令佢由季軍變第二，今場轉番阿湯，希望處理手法唔同，克服到C欄10檔嘅影響。而睇「旺國手」上季初跑同程即勝嘅表現，罕有地可以跟得前，卻冇削弱拉士勁度，締速又唔錯，是役頭馬幾有代表性，雖然今場比當時重10磅，如交足貨，未嘗冇得贏。

　　第七場三班1000米。「大把在手」今季跑咗3場，係到上場才覺際遇和處理上冇得懶，而贏佢嘅「威威財星」再出再W，帶出上場佢初跑田泥入Q嘅水準堅得。呢次寧跑短200米，同場幾匹實力馬都各有缺點，直接令佢機會提高。