洪禮賢講馬：帶旺來上場當冇跑過

魑魅魍魉

　　今季唔少華人倉口嘅大熱門成績都好正，姚本輝、文家良、徐雨石、葉楚航等等，季內佢哋唔係話得三兩隻捧成大熱而交到貨，基數算係充足，就好似日前贏「錢照贏」嘅姚廐，一共有9匹大熱門跑過，最差嗰隻原來係得第五名嘅「蓮華生輝」，餘下嘅馬錄得３Ｗ５Ｐ。

　　又例如文廐，連埋啱啱大熱贏咗嘅「鑽飾彩虹」，今季6匹大熱門，交出3冠1亞1季1殿，準到冇朋友啦！

　　初步睇過今期賽事嘅出馬陣容，第三場嗰隻「帶旺來」實係十幾蚊貨仔，就算釋出上場四升三班即敗嘅負能量，都唔慌有兩三個開，至於上場因咩情況、咩原因致敗，有睇過嘅馬友，心中除了有條刺，亦會心中有數！

　　「帶旺來」當時唔係輸在實力或升班阻力，千錯萬錯，錯在遇上偶然缺乏判斷力嘅黎海榮，此駒不幸畀「輕輕鬆鬆」燒乾咗，一睇頭兩段時間，仲快過同日精英碗，邊有可能捱到尾，所以呢場輸幾遠、名次如何？根本冇任何參考成分。

　　攞番前仗贏同程水準嚟講，鞍上人在末段，有時間慢慢望大熒幕兼按住韁返嚟，係咁意造出1.09.81（季內四班同程締速第三快），贏「香檳王」兩個身位，點可能喺三班冇得揮。輸完上場之後，準備工序冇問題，大閘及拍跳嘅走勢依然非常銳利，仲要畀埋個1檔佢，形勢非常有利，唔應該出現像上場因克服外檔而走多咗嘅危機，用得韋達註定熱食。