洪禮賢講馬：軍旗有分在手

四哥

　　第九場一班1400米。「雅雪」今季跑兩場都係P，前仗末段要對住「天久」和「步步穩」，完全係實力上嘅分野，唔夠鬥好正常。上賽則略失望，雖然早段畀廐友頂咗一陣至埋到欄，嗰段略為走多咗，但之後完全畀佢操控晒步速，返到嚟都係頂唔順「加州萬里」嘅衝刺，而唯一解釋到屈居第二嘅理據，可能係讓人19 磅。今場忽然唔使負重，仲抽埋1檔，而早段會同佢鬥快嘅馬又唔多，如小何步速發揮得宜，有望帶返。

　　第十場二班1400米。「軍旗」首戰名次普通，或之前因腳傷退出帶來後遺，但睇佢上場谷草1200米，早段大脫節，王志偉騎到死吓死吓，亦跟唔上主馬群，臨尾隻馬卻肯自動波湧番一段，剩係講爆嗰段仔，真係留下唔錯印象。復課工夫唔使就住，起碼唔使擔心不良於行嘅陰霾。表面上，升班跑對手強得多，惟加程至1400米較合目前性能，假假地曾勝「共創未來」，冇理由喺呢個分冇能力再上。