楝悉先機：精算拍檔班利位靚

魑魅魍魉

　　今夜國際騎師錦標賽，4場賽事有好多高手過招，好唔好賭係其次，好唔好睇先至重要，有時邊賭得晒咁多場賽事，好似阿棟咁，1期最多係挑三兩場出嚟買，其他場次翹埋對手睇跑馬。所以，有好多時都係hea住，但如果賽事精采，起碼刺激到視覺，就算我唔賭，可能有啲馬迷睇得開心又會買啲。總之，賽事好睇，唔好咁多奇奇怪怪場面，點都會幫到投X額！

　　第二場四班1200米。「中國好」自購馬落到四班仍然未贏，實力唔會叻，勝在目前處於作戰期，有勇態撐住。事實上，剛仗在同程只係事輸少少返嚟，叮噹馬頭一人一步，係冇運，但證明現時在四班係夠贏。今仗再配郭能，檔位亦好過上場，只要此駒唔係唔襟搏，有望坐正。

　　第三場四班1650米。「精算拍檔」計評分真係着數到不得了，都唔好提上季尾連場火併「易搏贏」、「紅跑車」，最後輸短距離嘅優異賽績，其實，在今季首兩仗跑得唔錯之後，以為可以續有表現，點知愈來愈衰，唔只1場令阿棟「揩野」！但唔係因為有損失，就去追馬，落到四班嘞，對住批甚麼對手，大家有眼睇，今仗檔位唔差，只要騎師唔係跑得太差，贏得啦！

　　好兄弟條件齊備

　　第六場三班1650米。「好兄弟」連續3場梗頸四，我都想寫個「服」字畀佢。講真，谷草1650米，成日都係對住同一群對手，叻嗰啲，三兩回合就上班，剩低嘅，塘水滾塘魚啦。佢就冇乜好，有狀態、有路程性能，同埋，今仗有個好人騎，希望夾夾埋埋，令佢入到三甲。

點買法

　　今晚揀第2場做重心Q，冇他，「中國好」勝在準，馬未交代，騎師又未開勝門，實搏盡！腳拖幾隻好檔嘅馬，好似2、3、6，三重彩留意1、9。獨贏過關則第二搭第三場，買埋呢口孖寶，因「精算拍檔」係冷門，如果跑第二，都有安慰獎收。

陳華棟 資深評馬人