洪禮賢講馬：玩具神話 唞夠出擊

港陌

　　第六場三班1000米。對於「加州滿意」上賽走勢略為失望，直路頭拉出嚟衝，以為會爆得好勁，點知衝落都係咁上下，但唔覺係騎者發揮有誤，因該役蔡明紹留放上及格有餘，要「奄尖」啲去挑剔，出彎前應該早啲迫起隻馬，不過，早啲發力亦未必更有威脅。

　　其實，上賽前佢嘅狀態係唔錯，埋門整課泥閘拍跳，雖然跳唔贏，但走過幾有氣勢，所以，剛賽跑出季內最佳名次，一點也不意外，希望嚟到季內第4回合，進度可繼續上；谷草1000米肯定嫌短，但之前此廐既有「帝豪名駒」，由一哩縮落1200米即贏，而此駒以前贏開谷草1200米，按理跑短200米，難度唔會大，或可試出彩虹。

近期做足工夫

　　第七場三班1650米。「玩具神話」跑完上場，隔咗一大輪始復出，期間工夫冇停過，快跳課期密麻麻，睇大告手法，似有操到夠先至再出心態。而睇隻馬昨朝大跑道走過，直路一段夠墜手，跳完回程仲好好火，舉止比平時活潑，睇嚟「閉關」日子獲益良多。當然，上番三班跑，對手惡過上場幾多，但目前進度重上軌道，乃季內最好1次，如果跑得出比前仗三班同程入P更佳水準，可能贏得到。