洪禮賢講馬：強駒 辣操搏命

猪拉多纳

　　今晚在谷草C+3欄C+6彎上演賽事，無可避免又係檔位抽獎，長久以來大利內檔馬，就以上期24/11，冇1場頭馬係6檔以外，而1、2檔馬更包辦6Ｗ，如非轉形勢，外檔馬好難大舉反擊。

重心場次　第3場　第四班（65-40分）1200米

　　「芙蓉威龍」終於唔再同大外檔扯上關係，畀佢排到1檔，預期跑法及處境會與近仗不一樣，只要唔係搏攰咗，唔難勝出。「太陽昇」跑低半班而負磅唔算重，卡士會比大部分對手優勝，希望6檔不致早段被頂出三叠，用到主動跑法，未必唔可以威脅前駒。

　　「永同至尊」唔係鬧情緒，或腳有事，三班都夠贏，5檔形勢唔會太差，會有三甲。「搖滾雄豐」冇谷閘冇實戰經驗，上場初跑此程可輸不遠，演出勝預期，尤其賽事中明顯比前仗冇咁難控制，睇嚟係跑1場好1場，呢次跑低半班兼好位，或有突破。

　　「先鞭直前」11月頭贏大閘締速幾好，但到月中那課大閘，仍見閘前反應唔好，恐落場跑仍是一樣。「質超駒」對手增加，Ｐ望較高。

第1場　第五班（40-10分）1650米

　　「強駒」近個幾月備戰唔係講玩，只係唔明點解唔等往後班內1400米，做好晒走嚟盲門谷草出賽；向來係懶鬼，但近試唔單止唔懶，拍跳經常好鬥得，忽然有此現象，狀態信得過。本身評分太着數了，如果唔係谷戰特差，或可破宿命。

　　「無敵鷹王」短直路及加眼罩，肯作針對性安排，帶出求勝決心。

　　「太平洋」近乎最後一戰，而2檔或幫到手，可能有Ｐ。「穩操勝算」谷草遠比田草合適，一哩亦未必應付唔到。

第2場　第四班（60-40分）1000米

　　「紅衣叻叻」差一步追唔到人，上場做阿二，雖然係可惜，但睇佢陣上的確冇之前咁促，愈乖就會愈叻，除非今場8檔處境好曳，如果唔係，應份贏番。

　　「西域雄心」和「東方駿馬」上場一Ｑ返，彼此俱有吸引表現，值得追。「哈哈妙」由於今場比較多馬搶，鍾意佢嘅程度遠不及上場。「盈驥」外檔唔怕，但賽事形勢或令其難跑。「火燎腚」試大閘有前有後，印象唔錯。「幸運多多」仍堅持上賽前睇法，認為朝早係有進步，腳傷復出第二回，可能跑得番。

第4場　第四班（60-40分）1650米

　　「十足十」暑後操練唔完整，休出可跑入獎金名次唔係易（直路彎仲要畀對手擯出外叠），按理熱身後會交出更高水準。「高歡」揀開又喼住好，再跟。「劍鋒」1檔，啱佢喜歡咬好位跑法。

　　「實業英雄」縮回一哩，效果或比長途好。「皆大歡喜」加程一試未嘗不可，總比長期喺1200米追唔切，嚟得有一絲寄望。「搏得威」冇內檔冇運行。「馬有成」死路程，等泥地一哩才諗。

第5場　第三班（85-60分）1200米

　　「賀喜」剛賽取位形同自殺，名次有幾後唔使理，肯跑番短途，或現真身。「蓬萊仙子」贏級數，輸路程經驗，但有番1檔，又未必克服唔到。

　　「同心威駿」大致跑盡，呢場可能已是水尾。「多多寶馬」12檔焗搶放，效果不如守好位咁有競爭力，但計能力則數一數二。「喜盛龍」Ａ欄蝕位追得好，唔等同C+3欄一樣掂！？

　　「連利福星」外檔難應付。「最佳孖寶」終於跑番啱路程，要重視。「比翼雙飛」唔係操練就住就住，落入此組真係好惡。

第6場　第三班（80-60分）1650米

　　「伽羅」要博轉場及加程帶來嘅影響，但上場試啱中置跑法，其實轉到谷草運用，效果仲會好。鍾意「傳奇快車」大閘一畀即湧上嘅走勢，只係要考考窄場性能。

　　「驚喜」重磅在三班跑，優勢不多，只因準開及位好，勉強拖一票。「金添好運」及「勇猛神駒」一對後上馬近況唔錯。

　　「馬風雲」評分阻力大。「追月」1檔會賺，三重彩可考慮。「輕越直前」106磅好大危險性，如9檔早段也搶到欄，有權放返。

第7場　第三班（80-60分）1650米

　　「蓋世子牙」1檔夾晒守靚位跑法，前仗贏得「闊袍大袖」，今場仍有資格。後駒受制於外檔及重磅，如剩係計狀態，佢係最正。

　　「寶貝王子」上場直路塞車係自己攞嚟，以為筍，楔埋欄，但跟錯馬夾到騎唔到，當然，轉回此程會好跑得多。「雪山神駒」唔鍾意柏寶上場演繹手法，換愛將，好大機會可跑番啱。「歡騰」及「聚好盈」為邊線分子。

第8場　第一班（115-90分）1200米

　　谷草短途王最強對最強；「八運寶」1200米7場未輸過，矇住眼都識跑！「美猴王」則5Ｗ，往績唔會輸蝕，單挑之局。

　　「開心歡笑」由田草轉細場，會賺級數。「威利多多」上屆盟主排1檔，原本形勢好好，但呢批對手太強，未必啃得落。「開心風采」受惠今場早段會偏快，直路鬥爆啱晒佢。