洪禮賢講馬：多利皇近試見風頭

港陌

　　近期韋達真係犀牛條脷（好犀利），對上5期騎師王，有4期係佢嘅世界，仲要經常係喺較後場次反先，唔係話開場冇耐，一早帶甩三幾十分嗰種，變相即係話如果大家追開佢，而又會幫襯騎師王，買走地回報唔錯，起碼唔係成日得１點幾嘅乏味賠率！

　　唔知韋達呢股氣勢會持續幾耐，但喺12月裡，佢的確開着咗贏馬mode，點解我會咁講，並唔係單單因為連贏三兩期騎師王咁簡單。睇番賽事剛好跑咗4個月，現時佢累積34場頭馬， 喺9 月贏9W、10 月6W、11 月8W，去到12月贏夠11W。換句話說，踏入季中，佢嗰副贏馬機器真真正正撻着咗。其實，佢喺12月嘅賽期，一係唔贏，通常都起個孖，8期之中，有5期單日贏兩W，當然，你話佢有運又得，多好馬在手亦得。

　　講開又講，韋達今季喺贏馬賠率方面有「改進」，對上幾季其實唔多贏冷馬，但今季呢個情況出現多咗，唔好計24倍W嘅「心中有程」，因係騎師賽抽配，餘下尚有「好旺寶」、「一路順風」、「富貴金龍」等，比較起上季，成年只得3W超過10倍，今季仲唔係有進步！

　　嚟到元旦日賽事，韋達坐騎又多又惡，尤其係蔡約翰幾駒，如第三場四班1200米的初出馬「多利皇」已是其中一員，試幾個大閘至出賽，由初期試起上嚟唔sharp，兼有啲嫩水， 到近試漸有風頭及規矩，既有好嘅變化，而唔少同父馬亦可打快攻，初出已有贏面。