馬主論戰

港陌

高歡1定贏番場

　　元旦日白德民意外多多，相信今晚佢應該會打醒十二分精神，先吼實第二場「高歡」，近三仗跑谷草一哩，試過中段踩油或後追等唔同跑法，結果全部上名，依家肯定有分在手，今次抽到一檔起步，白德民應該會把握機會贏番一場。

　　另外鍾意第四場「超晒班」，近三仗跑谷草次次接近，上仗改用放頭跑法都有第四，證明近態好弗，改配郭能有望開齋。

張敬山

喜綵跑法夠主動

　　告東尼今晚手馬陣容唔錯，我睇好佢有馬贏。鍾意第三場「喜綵」，呢隻馬跑法夠晒主動，照計跑谷草比沙田更具威力，今場快放馬唔算好多，估計佢可以全程守好位競逐，季內仲未交代，必打硬仗。另外推介第五場「一定快」，今季一路積極減分，上場跑谷草1200米爆冷殺入一席，證明評分開始有着數，縮程跑1000米咪睇小。

任達華

步步快收復失地

　　元旦日大摩冇乜運，好多隻馬都搏殺失手，不過呢個倉勝在子彈多，要響今晚贏馬應該唔難。先推介第七場「步步快」，上場初跑谷草一哩，末段一度收慢避開「智友」後蹄，最後都可以跑第五，表現搶眼，今次再跑同程如冇意外可以補中。

　　另外鍾意尾場「寶成智星」，上場跑谷草一哩亦上名，演出幾搶眼，抽到一檔起步係時候坐正。

寇鴻萍、梁廷鏘