馬主論戰

猪拉多纳

勁駿先拔頭籌

　　何良今日出馬唔多，但都有實力馬，我睇好佢有馬贏。吼實頭場「勁駿」，上季尾打叠贏兩場，實力高過一般五班馬，今季跑過四場熱身，今次回師泥地 1200米，排埋三檔起步，啱晒佢嘅放頭跑法，應該可以先拔頭籌。另一匹心水係第六場「醒目精英」，在港頭兩仗全部入Q，質素肯定高，上場輸在甩腳踏，今次捲土重來必打硬仗，熱都要捧。

張敬山

同一世界卡士高

　　今日重頭戲係第七場百年紀念短途盃，焦點一定落響「蓮華生輝」身上，不過大摩隻「同一世界」都唔可以睇小，前仗響馬會短途錦標已贏過「蓮華生輝」，上場跑國際賽出閘大漏，輸咗唔可以作準，今次只要出正常，話唔定可以捧盃而回。

　　另外，「步步」系馬初出不時都有好表現，第三場有匹「步步闖」首次上陣，賽前做足工夫，話唔定可掃晒。

寇鴻萍、梁廷鏘

多利皇開齋在望

　　蔡約翰今日成手惡馬，應該唔會空手而回，先吼實第六場「多利皇」，上場初出殺聲震天，捧到兩倍唔夠，點知畀突然神勇嘅「消費王」劏咗，今次增程跑1400米，相信蔡約翰唔會再失威，可以順利打開勝門。尾場蔡廐四路興兵，當中必有王者，最鍾意韋達坐騎「正毅」，上場久休復出都幾乎爆冷贏馬，熱身後表現肯定仲好，應該可以補中。

任達華