馬主論戰

猪拉多纳

齊勝四班唔輸蝕

　　李易達今晚只係出兩隻馬，但我都睇好佢有馬贏，其中第二場「齊勝」就一定要吼實。前仗響谷草1000米開齋，雖然只贏五班賽，但姿態夠晒輕鬆，上場返到四班跑，末段走勢一樣如狼似虎追入第四，證明響四班一啲都唔蝕底，今次增程有望贏番一場。

　　另一匹心水係第三場「文武維揚」，季內四戰冇W有Q，擺明係高質馬，柏寶鬥志如虹，熱都要捧。

張敬山

超群如意夠忠心

　　大摩剛啱憑「天賜福星」同「醒目精英」起孖，搏殺手風大順，今日繼續吼實呢個倉應該冇錯。最啱心水係尾場「超群如意」，上季跑八仗全部入前四名，夠晒忠心，今季唞夠先至上陣，睇嚟有心蓄銳一擊，咪睇小。另外鍾意第四場「金鑾大殿」，近幾場響田草1600米試過跟前同留後，突然轉嚟跑谷草 1800米，唔係陪跑格局。

任達華

衝鋒槍強項出擊

　　今晚重頭戲一月盃，我哋隻「衝鋒槍」有份上陣，眾所周知呢隻馬谷草威力最強，今次跑谷草1800米， 以往都贏過兩次，希望今次響柏寶胯下都有好演出，可以拉番一場頭馬喇！

　　另一匹心水係第六場「喜綵」，雖然上場贏在慢步速，但跑法主動嘅馬跑谷草向來有着數，今次排二檔起步，啱晒佢放頭跑法，上班負輕磅可能仲好跑，話唔定再次放到。

寇鴻萍、梁廷鏘