高清睇跑馬：星運俊爵再贏唔難

魑魅魍魉

　　「星運俊爵」大前仗加眼罩走勢變得積極， 此配備使其懶性大減，再出大有進步首次上名，該役本是後備身分，因為「一諾千金」退出得以補上，備戰欠缺積極，跑田草1000米排一檔形勢又差，殺入三甲了不起，況且賽事水準不俗，亞軍「領航人」與第六名「競駿寶寶」同樣再出贏馬。

　　到了上仗再爭同程，即總場次305，雖然正選參戰，但何澤堯身體不適未能上陣，改由絕少同方廐合作的鄭雨滇執韁，然而一樣交出好表現，甚至打開勝門，只見其贏得極之輕鬆，末段內閃下騎者齋推冇打鞭，修正後再衝刺，也因為加速力強勁，只是輕打四鞭，勝後僅加六分極之着數，再跑四班首本路程，對手多屬初出態未足，梅開二度冇問題。

深智能業劣勢跑第五

　　「深智能業」外地五戰僅獲一冠一季，水準不高亦未跑過右轉，上仗初出跑田草1200米，即總場次288，當然冇人睇好，但這匹大冷門走勢不俗，再深入分析，相信鞍上人勞愛德如騎得進取一點，分分鐘殺入大冷位，五檔起步後一心一意留前鬥後，馬匹尚未定型，此騎法無可厚非，奇怪轉彎少少外閃，德叔已經極速走出外檔，後追馬本來都沒所謂，反正入直路於外檔必可長驅直進，但德叔卻於入直路後走番入內檔衝，因此大部分時間被「至尊飛飛」頂住去路，之後又內閃，不肯在「奇葩」外面衝，難望空自然三甲不入，如此劣勢都跑第五，可見質素之高。

　　「深智能業」今次原班人馬再戰同程，勞愛德被馬會抽秤後演出已唔同款，應可見真章。

Sam